تشكيلة خمس مملحات بعجين واحد من تحضير حليمة الفيلالي (ميني بطبوط، ميني بيتزا، ميني برجر، باكيط…)
المكونات
مكونات العجين
5 كؤوس دقيق تقريبا 600 غرام
2 ملاعق حليب بودرة
ربع كأس زيت
2 ملاعق كبيرة زبدة
ملح
معلقة سكر
ملعقة ونصف خميرة الخبز
ماء دافئ
مكونات الحشوة 1
كمية اختيارية من صدر الدجاج
ملعقة صغيرة من الموطارد
عصير الحامض
2 ملاعق كبيرة ياغورت طبيعي
ملعقة صغيرة توابل الشاورما
فلفل أسود + زنجبيل + كركم + ملح + هريسة
صوص أندلس
جبن أحمر مبشور + خص
مكونات الحشوة 2
جبن الذهن
شرائح الجبن
الدجاج المدخن
خص
مكونات الحشوة 3
كمية من الكفتة
توابل الكفتة
ملح
دوائر الطماطم + خص
مربعات الجبن + صوص خاص بالبرجر
مكونات الحشوة 4
صلصة الطماطم
القمرون لي شحرناه مع زيت أو زبدة، ملح، فلفل أسود، القليل من الفلفل الحار
الزيتون الأخضر المقطع +جبن مودزاريلا +زيتون أسود
مكونات الحشوة 5
علبة طون مصفية من الزيت
زيتون أخضر مقطع
ذرة مصبرة (ماييز)
القليل من عصير الحامض
جزر محكوك بشكل طولي (حبة كبيرة أو 2 صغار)
كمية معقولة من المايونيز + القليل من الهريسة
طريقة التحضير
تحضير العجين
في وعاء أو قصرية نضع 5 كؤوس من الدقيق المنخول
نضيف ملعقة ونصف خميرة الخبز و 2 ملاعق حليب بودرة
ملح وربع كأس زيت نخلطو كلشي
ونجمعو العجين بالماء دافئ
إلى متوفرش الحليب المجفف نجمعو العجين بالحليب العادي ويكون دافي
لكن من الأحسن يكون الحليب المجفف حيت كيعطي مفعول بحال محسن الخبز
نجمعو العجين حتى نحصلو على عجين رطبة
ملاحظة جميع المعجنات باش تجي رطبة وخفيفة خاص تكون العجين رطبة
من كنجمعو العجين كناخدو الزبدة لي كتكون بحرارة المطبخ وكندخلوها فيها
وفنفس الوقت كندلكو العجين حتى كتجمع وكتولي رطبة
من الأحسن نزيدو الزبدة حتى الآخير كتعطي نتيجة أفضل من أننا نزيدوها فلول مذوبة
كنخليو العجين تختمر مزيان حتى يتضاعف الحجم ديالها
من بعد ما كتختمر العجين كنقسموها على 5 الأجزاء
الجزء الأول على شكل ميني برجر
نقسمو العجين ل 8 الكويرات صغار الوزن ديالها تقريبا 30 غرام
نرشوهم بالقليل من الدقيق ونوضعوهم فصفيحة الفرن
ونخليوهم يختامرو
من بعد مكيختامرو كنذهنوهم بصفار البيض مع صلصة الصوجا والخل
أو صفار البيض مع الخل والحليب حسب المتوفر
وكنزينوهم بالزنجلان وحبوب الخشخاش
وكندخلوهم الفران سخون يطيبو على 190 حتال 200 درجة
فلول كنشعلو عليهم من التحت حتى كيدخلهم الطياب
وكنشعلو من التحت والفوق حتى كيتحمرو
الجزء الثاني على شكل ميني باكيط
حتا هما نقسمو العجين ل 8 الكويرات صغار ونفس الوزن تقريبا
نرشو سطح العمل بالقليل من الدقيق ونطلقو العجين بشكل طولي ونجمعوها من الجناب
حتى نحصلو على شكل باكيط كما هو موضح فالصور
ونوضعوهم فنفس صفيحة الفرن ونخليوهم يختامرو
من بعد مكيختامرو كنذهنوهم بصفار البيض مع صلصة الصوجا والخل
أو صفار البيض مع الخل والحليب حسب المتوفر
وكنزينوهم بالزرارع والشوفان
وكندخلوهم الفران سخون يطيبو على 190 حتال 200 درجة
فلول كنشعلو عليهم من التحت حتى كيدخلهم الطياب
وكنشعلو من التحت والفوق حتى كيتحمرو
الجزء الثالث على شكل السفنج
حتا هما كنقسمو العجين ل 8 الكويرات صغار ونفس الوزن تقريبا
كنعملو حفرة وسط الكويرة على شكل إسفنجة
ونوضعوهم فصفيحة الفرن ونخليوهم يختامرو
من بعد مكيختامرو كنذهنوهم بصفار البيض مع صلصة الصوجا والخل
أو صفار البيض مع الخل والحليب حسب المتوفر
وكنزينوهم بالفرماج الأحمر مبشور
وكندخلوهم الفران سخون يطيبو على 190 حتال 200 درجة
فلول كنشعلو عليهم من التحت حتى كيدخلهم الطياب
وكنشعلو من التحت والفوق حتى كيتحمرو
الجزء الرابع على شكل ميني بيتزا
كنطلقو العجين بالدلاك ونقطوه دوائر صغار
نرشو الدقيق ونتأكدو بلي العجين مالسقاش باش تبقا محافضة على الشكل ديالها
كنوضعو العجين فصفيحة الفرن ونتقبوها بالفورشيط
ومباشرة ندخلوها للفرن غير تشد راسها ونخرجوها
الجزء الخامس على شكل ميني بطبوط
كنطلقو العجين بالدلاك ونقطوها دوائر صغار
ونخليوها ترتاح شوية ونطيبوها فمقلة لي سخونة مزيان
ونبقاو نقلبوه كل شوية باش يتنفخ ويجي مهوي من الداخل
الحشو الأولى (ميني باكيط)
كناخدو كمية من صدر الدجاج كنضيفو ليه ملعقة صغيرة من الموطارد
عصير الحامض +2 ملاعق كبيرة ياغورت طبيعي
ملعقة صغيرة توابل الشاورما
فلفل أسود + زنجبيل + كركم + ملح+ هريسة
كنخلطو الكل جيدا وكنخليو الدجاج يتشرب التوابل لمدة معينة
وكناخدو مقلة نديرو فيها كمية من الزيت ونزيدو الدجاج
على نار عالية نشحرو الدجاج مع التحريك المستمر
حتى ينشف من السوائل جيدا
من بعد مكيطبو لي ميني باكيط كنحلوهم من جهة
كنذهنوهم بصوص أندلس ونفرشو الخص ونزيدو الدجاج ثم الجبن
وبنفس الطريقة حتا نسالييو كلشي
الحشوة الثانية (شكل الإسفنجة)
كناخد الجزء لى شكلناه على شكل اسفنجة
من بعد مايطيب نقطعوه من الوسط كما هو موضح فالصور
ناخدو الجزء السفلي نذهنوه بجبنة الذهن ونديرو فوقها الخص
ثم شرائح الجبن ثم الدجاج المدخن ونوضعو الجزء العلوي
نتمم الكل بنفس الطريقة
الحشوة الثالثة ( برجر)
حشوة البرجر
كناخدو كمية من الكفتة كنزيدولا توابل الكفتة وشوية الملح
كنشكلوها كويرات بمقياس البرجر
وكنشحروها فمقلة سخونة بدون زيت
كناخدو خبيزات البرجر كنقسموهم
ونذهنو بالصوص كنديرو الخص ثم الكفتة ثم الطماطم وأخيرا الجبن
ونثبتها بعود خشبي ونتمم الكل بنفس الطريقة
الحشوة الرابعة (ميني بيتزا)
من ما طيبنا عجين البيتزا نصف طيبة
كندهنوها بصلصة الطماطم
ونضيفو القمرون لي شحرناه مع زيت أو زبدة، ملح، فلفل أسود، القليل من الفلفل الحار
نضيفو الزيتون الأخضر المقطع وفالأخير جبن مودزاريلا وزيتونة سوداء في الوسط
ندخلوها لفرن لي سخون مزيان غير يبدا يتحمر العجين ونخرجوها
الحشوة الخامسة (ميني بطبوط)
كناخدو إناء نديرو فيه علبة طون مصفية من الزيت، زيتون أخضر مقطع
ذرة مصبرة (ماييز)، القليل من عصير الحامض
جزر محكوك بشكل طولي، كمية معقولة من المايونيز والقليل من الهريسة
نخلطو كلشي مزيان ونعمرو الميني بطبوط لي كنحلوه بالمقص
وبالصحة والراحة